Русија и Кина се подготвени да застанат рамо до рамо во одбрана на заедничките фундаментални интереси со стратешко координирање на нивните напори на глобалната арена, изјави денеска рускиот министер за надворешни работи Сергеј Лавров.
Лавров рече дека кинескиот министер за надворешни работи Чин Ганг, како и неговите претходници, се добри пријатели и колеги.
„Се разбира, споделуваме чувство на другарство и подготвени сме да застанеме рамо до рамо бранејќи ги основните интереси на едни со други преку стратешко координирање на напорите на глобалната арена“, рече Лавров во интервју за порталот AIF.ru.
Тој посочи дека руско-кинеската соработка игра „главна улога во формирањето на поправеден, поурамнотежен, полицентричен светски поредок“ заснован на меѓународното право и централната улога на Обединетите нации, пренесе ТАСС.
Според шефот на руската дипломатија, неодамнешната посета на кинескиот претседател Си Џинпинг на Русија била пресвртница во модерната историја на руско-кинеските односи и потврда за „невиденото високо ниво и посебен карактер на билатералната соработка меѓу двете земји“.