Ѕвездата на Лос Анџелес Лејкерс, Леброн Џејмс, кој го пропушти поразот во четвртокот од Голден Стејт Вориорс во Сан Франциско, најверојатно ќе се врати на теренот за петочниот натпревар на домашен терен против Сан Антонио Спарс.
Џејмс имал болка во левиот зглоб, а Лејкерси загубија со 110-128 од Вориорс.
„Ќе дознаеме официјално во петок наутро и ќе процениме, но по голема веројатност тој треба да биде достапен за натпреварот“, рече тренерот на Лејкерс, Дарвин Хам.
Џејмс се појави на Ол-стар натпреварот во Индијанаполис во неделата. Тој постигна 8 поени за 14 минути во првото полувреме, пред да го пропушти второто полувреме од поразот на Западот со 186-211.
Тој го пропушти и последниот натпревар на Лејкерси пред паузата, победата над Јута Џез со 138-122 на 14 февруари во Солт Лејк Сити.
Џејмс (39) оваа сезона играше на 49 од 57 натпревари на Лејкерси, со просек од 24,8 поени, 7,8 асистенции и 7,2 скока по натпревар. Досега има 16 дабл-дабл и три трипл-дабл учиноци.
Настапот на Ол-стар беше 20-ти за Џејмс, четирикратен шампион во НБА и четирикратен МВП. Тој е најдобар стрелец на сите времиња во НБА со 39.868 поени.