Шарл Леклер беше на помалку од 21 секунда до соборување на рекордот за најбрза трка во историјата на Формула 1 на вчерашната трка за Големата награда на Италија.
Пилотот од Монако го помина растојанието од 53 круга или 306.720 километри за 1:14:40.727 часа, забележувајќи просечна брзина од 246.431 km/h. Така, тој не успеа да го подобри рекордот на Михаел Шумахер од 2003 година, кога Германецот победи на „Монца“ за 1:14:19.838 часа со просечна брзина од 247.586 km/h.
Всушност, подвигот на Леклер не е ни вториот најдобар во историјата. Во 2005 година, повторно во Монца, Хуан Пабло Монтоја победи со просечна брзина од 247.096 km/h за 1:14:28.659 часа. Единствениот друг пат кога победникот на Италијанското Гран При заврши за помалку од 75 минути на целото растојание на трката беше во 2006 година, кога Михаел Шумахер ја мина целта 1:14:51.975 часа по почетокот, забележувајќи просечна брзина од 245.814 км/ч.
Минатата година Макс Верстапен победи на Големата награда на Италија за 1:13:41.143 часа, но тогаш трката беше скратена за два круга поради потребата да се направат два дополнителни круга за загревање. Просечната брзина на Холанѓанецот на растојание од 295.134 km беше 240.318 км/ч.