Спортскиот директор на Пари Сен Жермен, Леонардо е свесен дека францускиот тим се уште не е на очекуваното ниво, но истакнува дека неговите играчи и тренерот Маурицио Почетино се соочуваат со остри критики.
ПСЖ го победи Лил во петокот по пресврт со 2-1. Големо внимание беше посветено на одлуката на тренерот Почетино да го замени Лионел Меси на полувремето, а бројни критики беа упатени кон еден од најдобрите светски фудбалери.
„Меси помина повеќе време со репрезентацијата отколку со нас. Со толку многу патувања, нормално е да има проблем“, објасни Леонардо, а потоа додаде:
„Не сум загрижен… Луѓето мислат дека не знаеме ништо за играчите, дека тие прават што сакаат. Но, тоа не е вистина. Ако не им оди добро, тогаш разговараме со нив. Никогаш не ни недостасувало желба. Не можете така да зборувате за Меси, Мбапе, Нејмар… и Рамос. Знаевме дека има проблем кога го донесовме. Не сакам критики на наша сметка. Може да се каже дека не сме добри, но некои коментари се премногу остри. Да се каже дека нашиот тренер не разбира фудбал или дека играчите што ги доведовме се очајни, нема смисла. Некои луѓе сакаат да се прослават преку ПСЖ“.
Спортскиот директор на клубот од Париз е свесен дека тимот може и мора многу повеќе.
„Мораме да напредуваме, тоа е јасно. Но и оваа ситуација е нормална, со оглед на тоа што ни се случи. Некои играчи дојдоа на крајот од преодниот рок, се случија големи промени. Не сме таму каде што сакаме да бидеме, но тимот работи напорно и тоа е важно“.