Како солидарност со Чешка, Литванија протера двајца руски дипломати, а Летонија и Естонија по еден, објавија министерствата за надворешни работи на тие земји.
„Во знак на солидарност со нашите чешки сојузници и поради кршење на Виенската конвенција, Летонија донесе одлука за протерување на рускиот дипломат. Летонија нема да толерира субверзивни активности на нејзината територија, како и на територијата на нејзините сојузници и партнери“, објави министерот за надворешни работи на таа земја, Едгарс Ринкевич на Твитер.
In solidarity with our Czech allies and due to the violations of Vienna Convention #Latvia has decided to expel a Russian diplomat. Latvia will not tolerate subversive activities on its soil or that of its partners and allies
🇱🇻 🤝 🇨🇿— Edgars Rinkēvičs (@edgarsrinkevics) April 23, 2021
Министерството за надворешни работи на Литванија го повика претставникот на Амбасадата на Русија во Литванија и му предаде дипломатска нота, со која двајцата вработени во амбасадата се прогласени за персона нон грата, се наведува во соопштението на веб-страницата на Министерството.
Се посочува дека двајцата дипломати, кои наводно „вршеле активности некомпатибилни со нивниот дипломатски статус“, имаат рок од седум дена да ја напуштат земјата. Нагласено е дека ваквиот чекор сведочи за „солидарноста“ на Литванија со Чешка.
Рига, Вилнус и Талин одговорија на овој начин на барањето на Прага до земјите на НАТО и ЕУ да се солидаризираат со Чешка, која претходно протера 18 руски дипломати, откако чешкиот премиер Андреј Бабиш на 17 април рече дека Прага се сомнева на руското разузнавање дека се одговорни за експлозијата во складиштето за муниција во селото Врбјетице во 2014 година.
Следниот ден Русија прогласи 20 лица вработени во амбасадата во Чешка за персона нон грата. После тоа, Министерството за надворешни работи на Чешка одлучи да го изедначи бројот на вработени во руската амбасада во Прага до крајот на мај со бројот на вработени во чешката амбасада во Русија, што значи дека околу 70 вработени во Руската амбасада треба да ја напушти Прага.