Партијата Левица информира дека го добила судскиот спор за клевета во кој тужител беше премиерот Христијан Мицкоски, а негов адвокат, министерот за внатрешни работи, Панче Тошковски.
-Суетите на премиерот Христијан Мицкоски и министерот за внатрешни работи, Панче Тошковски и анимозитетот кон Левица а не кон СДСМ, кулминираа со тужба во која премиерот-подносител и министерот-адвокат бараат преку политички мотивирана хајка да се притисне и извини Левица поради наводно нарушен углед и достоинство на подносителот.
Предметот на тужба е видео-соопштението на Левица насловено ,,Фирми на Анѓушев и Мицкоски добиваат тендери во Општина Кисела Вода”. Судот ја одби оваа небулозна и суетна тужба на Мицкоски и Тошковски, чиј проблем со Левица е тоа што не е дел од мафијашко-политичките врски кои ги обединуваат ДПМНЕ и СДС со олигархијата, порачаа од Левица.
Од партијата велат дека ќе продолжат да бидат најизразена опозициска партија и ќе продолжат да посочуваат на, како што велат, криминогената природа и врски со олигархијата на ДПМНЕ – како на централно ниво, така и на локално.
-Откако ДПМНЕ го уништија Скопје до ниво на нефункционалност, извесно е следната година за градоначалник на град Скопје да биде предложен Орце Ѓорѓиевски – со цел да се донесе Генерален урбанистички план во кој ќе има плен за целата олигархија, проверена пракса во Општина Кисела Вода каде е и моментално градоначалник, стои во соопштението од партијата на Димитар Апасиев.
Според одлуката, се задолжува премиерот Мицкоски да ги надомести сите судски трошоци на Левица.