Левица го кажа својот услов, според кој би ја дале поддршката за Законите за реорганизација и трансформација на министерствата во Владата. Како што објави пратеникот Амар Мециновиќ, условот е промена на сегашниот изборен модел.
-Левица има услов за поддршка на измените за реорганизација на органите кои ги предложи Мицкоски: воведување ЕДНА ИЗБОРНА ЕДИНИЦА веднаш и имате 6 гласови за реорганизација, објави Мециновиќ на социјалните мрежи.
Колку за потсетување, за усвојување на законите потребно е 2/3 мнозинство во Собранието, кое во моментов владеачката коалиција го нема.
Претходно идниот мандатар Христијан Мицкоски информираше дека ги поднел законските измени за реорганизација на државната управа. Предвидено е Министерството за економија и труд да биде Министерство кои ги опфаќа дел од ингеренциите од старото министерство, но додаден и сегментот труд, за да можат работодавачите и работниците да бидат во едно место.
Според Мицкоски, Министерството за социјална политика и труд ќе биде Министерство за социјална политика, демографија и млади. Агенцијата за млади и спорт нема повеќе да постои и ќе има посебно Министерство за спорт.
Досегашните надлежности на Министерството за економија во делот на рударството и енергетиката, ќе бидат дел од новото Министерство за енергетика, рударство и минерални суровини. Исто така, делот од ингеренциите кои ги имаше Министерството за економија, во делот на туризмот, ќе бидат присоединети во новото Министерство за култура и туризам. Ново министерство ќе биде и Министерството за администрација.