Либан го смета францускиот предлог за ставање крај на конфликтот со Израел и да се прецизираат границите меѓу двете држави како „значаен чекор“ кон мирот, рече либанскиот министер за надворешни работи Абдала Бу Хабиб во писмото што на увид го имал Ројтерс.
Францускиот план беше доставен до Либан минатиот месец и вклучува три фази во кои воените операции на либанските вооружени групи, како Хезболах, ќе бидат прекинати, а редовните трупи на либанската армија ќе бидат распоредени на југ, во близина на границата со Израел.
Либанската вооружена група Хезболах започна граничен конфликт со Израел во октомври минатата година, по почетокот на израелската агресија врз Газа.
За да успее планот, Хезболах, група поддржана од Иран, треба да се согласи со овие услови, но групата вели дека нема да го прекине конфликтот додека не се постигне прекин на огнот во Појасот Газа.
Во писмото упатено до француската амбасада, либанското Министерство за надворешни работи вели дека Бејрут „верува дека француската иницијатива може да биде значаен чекор кон мирот и безбедноста во Либан и поширокиот регион.
Во писмото не се споменуваат конкретните чекори наведени во францускиот предлог, но либанското Министерство наведува дека резолуцијата 1701 на Советот за безбедност на ОН, со која заврши последната голема војна меѓу Хезболах и Израел во 2006 година, е „камен-темелник за постигнување трајна стабилност“.
Во писмото, исто така, се наведува дека „Либан не бара војна“, туку сака да се стави крај на, како што го нарече, израелското прекршување на територијалниот суверенитет на Либан по копно, воздух и море.
Кога тие прекршувања ќе престанат, Либан ќе се обврзе да ги обнови тристраните состаноци со мировниците на ОН и Израел „за да разговараат за сите спорови и да постигнат договор за целосна и сеопфатна имплементација на Резолуцијата за безбедност на ОН 1701“, соопшти либанското Министерство.
Оваа резолуција на ОН бара целосен прекин на непријателствата, распоредување на либанските сили во јужниот дел на земјата, како и паралелно повлекување на израелските сили зад Сината линија што ги дели Израел и Либан.
Американскиот пратеник Амос Хохштајн исто така разговара со Либан за постигнување дипломатско решение за граничните борби меѓу двете држави.