По падот на Вељко Беливук и неговиот криминален клан, осомничената М.Р., која била девојка на Беливук шест години, се согласила да соработува со истражителите.
Како дел од акцијата на полицијата, обвинителството и БИА, во која беше растурен најсилниот криминален клан во Србија, уапсена е и М.Р., која била во љубовна врска со организаторот на групата Вељко Беливук! Против неа е поднесена кривична пријава и таа е осомничена дека е член на групата, која е осомничена за киднапирања, брутални убиства, трговија со дрога, поседување арсенал оружје, како и перење пари.
– М.Р. има статус на осомничена и е под истрага. Од неа полицијата запленила пет телефони, лаптопи и биле испратени на вештачење. Се сомнева дека не учествувала во ликвидациите, но дека имала улога во прикривање на паричните текови и перењето пари – вели извор за српски „Курир“.
Тој открива дека еден од петте телефони бил криптиран, за тајна комуникација.
– Истражителите беа шокирани кога влегоа во нејзините телефони. Во нив биле пронајдени гадни снимки и фотографии, од кои неколку покажуваат мртви и осакатени лица, за чие убиство е осомничена криминалната група на Беливук. Освен доказите за злосторството, во нејзините телефони се пронајдени и други важни докази, како и пораките што ги разменувала со Вељко Беливук.
Според него, М.Р. била вработена во позната белградска компанија и била изненадена од апсењето. Полицијата, како што додава, детално го пребарала нејзиниот изнајмен стан во луксузен комплекс во Нов Белград.
– М.Р и Беливук наводно се запознале пред шест години и биле во врска додека тој бил во притвор за убиството на Властимир Милошевиќ, за што судот го ослободи. Поминаа многу време заедно и таа била упатена за сè што направи, каде се движел и со кого се гледал, таа одела и во бункерот на стадионот „Партизан“, но и на други места каде што се гледале – открива изворот и наведува дека строго воделе сметка да не ја напуштаат земјата заедно, за да не бидат регистрирани.
– Таа веднаш се согласи да соработува со истражителите. Таа призна каква врска имала со Беливук и покажа подготвеност да разговара за сè што знае. Таа дури ги дала и кодовите за четири телефони, но не и за петтиот – открива извор од истрагата.
Според него, не е исклучена можноста таа да добие привилегиран статус.