Фудбалерот на Рома, Ромелу Лукаку блесна по убедливиот триумф на „волците“ над Брајтон во осминафиналето на Лигата на Европа.
Избраниците на Даниеле Де Роси победија со 4:0, а Лукаку го постигна вториот гол на својот тим.
Запрашан за долгорочните планови во кариерата и можното враќање во Челси, позајмениот играч од „сините“ одговори „тактички“ – со оглед на тоа што минатата сезона ситуацијата ескалира веднаш по едно интервју во кое тој рече дека е посветен на Интер и дека пред крајот од кариерата би сакал да игра за тој клуб.
Белгискиот напаѓач дојде во Рома на едногодишна позајмица летото по неуспешните преговори со Интер и Јувентус. Ромелу блеска во италијанската престолнина – на 35 натпревари во сите натпреварувања постигна 18 гола и даде четири асистенции.
„Штом пристигнав видов колку навивачите ја сакаат Рома. Како треба да се однесувам ми кажа сонародникот Раџа Наинголан, а јас уште од стартот „кликнав“ со соиграчите. На моето искуство во Рим големо влијание имаше и поранешниот тренер на клубот Жозе Мурињо, а ми помага и Де Роси. Давам се од себе за Рома“, изјави Лукаку и додаде:
„Многумина не знаат во каква ситуација бев и благодарам на Рома што веруваше во мене. Не сакам да предизвикувам контроверзии во Англија, морам да бидам мудар и да ги бирам зборовите на оваа тема. Веќе знаете на што мислам… Ја научив лекцијата, тишината е злато“.
Рома во 28. коло во италијанското првенство гостува кај Фиорентина, а потоа повторно ќе се соочи со Брајтон.