Меѓународната агенција за атомска енергија (МААЕ) објави дека нејзини претставници извршиле увид во оштетената разладна кула во нуклеарната централа Запорожје во Украина, но не можеле веднаш да ја утврдат причината за пожарот што избувна викендов, пренесува Хина.
Москва и Киев меѓусебно се обвинуваат за подметнување пожар во огромната неактивна нуклеарна централа во Украина, при што Русија обвини за напад со беспилотно летало, а Украина вели дека најверојатно станува збор за руско невнимание или подметнување пожар, пишува Ројтерс.
Тимот на МААЕ не најде непосредни докази за остатоци од беспилотни летала и оцени дека примарниот извор на пожарот најверојатно не бил во основата на разладната кула, се вели во соопштението на МААЕ на својата веб-страница.
„Тимот не можеше да дојде до конечни заклучоци за причината за пожарот врз основа на досегашните наоди и набљудувања“, наведува агенцијата.
Ниту Москва ниту Киев не пријавиле знаци на зголемено зрачење.
МААЕ соопшти дека штетата најверојатно била концентрирана во кулата на ниво на дистрибуција на воден млаз, на висина од приближно десет метри.
„Нуклеарната безбедност на електраната не е загрозена бидејќи кулите за ладење во моментов не се во функција“, додадоа оттаму.
Русија заплени централа во Украина набргу откако започна целосна инвазија на својот помал сосед во 2022 година, што ја нарекува „специјална воена операција“.