Македонија и Србија денеска во Скопје потпишаа Меморандум за соработка на полето на европските интеграции. Документот го потпишаа вицепремиерот за европски прашања, Бојан Маричиќ и српската министерка за европски интеграции, Тања Мишчевиќ.
Двајцата министри се согласија дека европската перспектива на нивните земји е остварлива како никогаш досега и дека политичкиот моментум и поддршката на Брисел и земјите-членки треба да се искористи за да се даде нова динамика на преговорите со ЕУ.
„Она што го очекуваме од ЕУ е јасен план за проширување на Унијата, што ќе биде поттик за забрзување на процесот на трансформација на нашите општества. Покажавме дека сме кредибилен партнер на ЕУ и дека сме подготвени да одговориме на задачите. Секако, сега е редот на Унијата да даде временска рамка за членство која ќе биде остварлива и која ќе ни даде доволно време да ги завршиме нашите задачи, но и доволно надеж дека членството во ЕУ ќе биде навистина брзо“, изјави Маричиќ.
Како што истакна, потпишувањето на овој меморандум придонесува за подготовка и олеснување на пристапниот процес на две земји од ЕУ.
„Искуството и размената на знаења и информации, практиките меѓу преговарачките групи и експертите вклучени во преговорите, како и релевантните министерства и агенции во спроведувањето на политиките во сите кластери ќе бидат важен придонес за нас во ефективно управување со овој процес“, додаде Маричиќ.
Мишчевиќ посочи дека има одлична хемија и одличен дух меѓу двете институции, кои во две братски земји се занимаваат со стратешки најважната работа, процесот на европска интеграција.
„Денес на тој процес му се дава една убава рамка и таа рамка се вика Меморандум за соработка на полето на евроинтеграциите. Соработуваме многу долго, многу успешно. Некогаш учиме од Македонија, некогаш Македонија учи од нас, но денес е вистинско време да се зборува за новата методологија за да можеме суштински да работиме заедно. Како што рече Маричиќ, нашата задача е да се обидеме да најдеме заеднички пристап кон ЕУ и земјите-членки кога зборуваме конкретно за апликацијата. на новата методологија, која е тука и ќе остане таму“, рече Мишчевиќ.