Црногорците, Хрватите и Бугарите ќе станат уставна категорија со усвојувањето на уставните амандмани во Северна Македонија, изјави денеска новоименуваниот амбасадор на Република Северна Македонија во Подгорица, Зеќир Рамчиловиќ.
Како што соопшти Министерството за човекови и малцински права, тој го информирал министерот Фатмир Џека за постапката за усвојување на уставните амандмани и ја повторил иницијативата за формирање на Македонски национален совет во Црна Гора.
Македонскиот дипломат истакна дека Црна Гора и Република Северна Македонија континуирано меѓусебно се поддржуваат во многу области од интерес, особено во процесот на европска интеграција.
Џека, како што е наведено, му рекол на новоименуваниот амбасадор дека Црна Гора силно ја поддржува европската агенда на земјите од регионот и дека ќе ја обезбеди сета експертска и техничка помош на Северна Македонија на нејзиниот интегративен пат.
„Процесот на европска интеграција се смета за најдобра моментална платформа за размена на мислења и искуства со цел да се подобрат постоечките можности за двете земји“, смета Џека.
Амбасадорот Рамчиловиќ се заблагодарил за приемот и додал дека му е особено задоволство што добил мандат во Црна Гора, пријателска, блиска земја која има богато искуство во процесот на пристапување во Европската унија.
Според извештаите, двајцата размениле мислења за заедничките предизвици на двете земји, важноста од зачувување и натамошно унапредување на меѓудржавните односи и соработката во областа на заштитата на човековите и малцинските права.
Тие констатирале дека регионалната и меѓународната соработка може да се подобри преку позитивни примери, кои секоја земја може да ги имплементира додека се прилагодува на своите околности.