Околу 200 луѓе протестираа денес во Истанбул затоа што францускиот сатиричен неделник „Шарли Ебдо“ неодамна ги објави карикатурите на пророкот Мухамед.
На 7 јануари 2015 година, браќата Шериф и Саид Куаши упаднаа во редакцијата на сатиричниот весник во Париз, каде убија 12 новинари и карикатуристи, извикувајќи дека го „одмаздиле пророкот (Мухамед)“. Меѓу жртвите имало познати карикатуристи кои се потпишувале со прекари, Каби, Волински, Оноре и Тиња, како и поранешниот директор на редакцијата на весникот, Бернард Марис.
Судскиот процес за група од 14 осомничени за поддршка на напаѓачите започна во Париз на 2 септември.
Демонстрантите во Истанбул денеска носеа плакати со кои им закануваа на сатиричниот неделник и на францускиот претседател Емануел Макрон. На дел од транспарентите можеа да се видат зборови како „Макрон ќе плати висока цена“ или „Макрон е сатана, не е човек“.
Турското Министерство за надворешни работи го осуди повторното објавување на карикатурата, оценувајќи ја како „недостаток на почит кон религијата и пророкот“.
„Шарли Ебдо“ по нападот изјави дека, и покрај заканите, тој ќе продолжи со сатирата и да го критикува општеството и дека нема да има табуа.