„Франција изрази солидарност со Грција и Бугарија и е подготвена да понуди помош во заштитата на границите на ЕУ од пристигнување мигранти“, рече францускиот лидер Макрон.
Со влошената состојба во сириската провинција Идлиб, Турција вели дека повеќе нема да може да ги ограничи приливите на мигрантите и бегалците и ги отвори своите граници со ЕУ.
„Изразувајќи целосна солидарност со Грција и Бугарија, Франција е подготвена да придонесе во напорите на европските земји, давајќи им оперативна помош и заштита на своите граници. Треба да работиме заедно за да избегнеме хуманитарна и миграциска криза “, напиша Макрон на Твитер.
Вчера, по итен состанок на грчкиот Национален совет за безбедност, владиниот портпарол Стелиос Петас рече дека ситуацијата со бегалците е „активна, сериозна, исклучителна и асиметрична закана за националната безбедност на земјата“.
Претходно, грчкото Министерство за надворешни работи соопшти дека Турција спроведува кампања за дезинформации и дека извештаите за десетици илјади мигранти кои влегле во Грција не биле точни. Турскиот министер за внатрешни работи Сулејман Соилу за „Дејли Сабах“ изјави дека 100.000 мигранти ја преминале границата со Грција.