Макрон и се обрати на нацијата денес поради зголемениот број на лица заразени со коронавирус. Тој преку телевизиско обраќање објави дека се воведуваат нови правила, чија цел е да се потисне пандемијата на коронавирус, особено делта сојот, кој рапидно се шири во Европа.
Главната мерка воведена од францускиот претседател е задолжителната вакцинација. Имено, на сите здравствени работници во Франција им беше наредено да бидат вакцинирани до 15 септември. Покрај тоа, ќе има воведување на специјални пропусници за секој што сака да оди во ресторан, трговски центар и на неколку други јавни места.
Како што најави Макрон, тие ќе бидат дигитални, и ќе содржат податоци за извршената вакцинација или прележаниот вирус.
„Ако не реагираме денес, бројот на заразени ќе продолжи да се зголемува“, рече Макрон. Новината е потенцијална казна за здравствените работници кои не сакаат да се вакцинираат.
„Вакцинацијата е прашање на индивидуална одговорност, но и на нашата слобода“, истакна францускиот претседател.
Кампањата за вакцинација за учениците од средните училишта и основните училишта ќе започне во септември, кога се очекува учениците да се вратат на училиште. Меѓу мерките на Макрон беше и ПЦР-тестот, кој нема да биде бесплатен од септември, освен ако лекарите не го препорачаат.
„Ова ќе биде лето на економско закрепнување“, рече Макрон во образложението на својата одлука.
Набргу по обраќањето на претседателот, здравствениот портал „Doctolib.fr“ падна поради голем број луѓе кои се обидоа да закажат состанок за вакцинација.
Франција во понеделникот објави 1.260 нови случаи на коронавирус, додека стапката на вакцинација опадна. Во моментов, околу 40 проценти од населението е целосно вакцинирано.