Францускиот претседател Емануел Макрон ја повика Европа денес на „порафиниран и појасен“ став кон Турција, која, како што рече, „повеќе не е партнер“ во источниот Медитеран.
„Ние, Европејците, мора да бидеме јасни и решителни кон владата на претседателот (Реџеп Таип) Ердоган, кој денес се однесува неприфатливо“ и кој мора да ги „разјасни своите намери“, рече Макрон пред самитот на земјите од јужна Европска унија (ЕУ) во Корзика. нагласувајќи ја „длабоката желба“ за „повторно вклучување во плоден дијалог со Турција“.
Францускиот претседател рече дека Турција потпишала „неприфатливи договори со либиската влада за национално единство, со кои се негираат легитимните права на Грција“ и дека „се дупчи во кипарската зона … што денес е неприфатливо“.
„Јасно е дека Турција денес повеќе не е партнер на овој регион“, рече Макрон.
Денес, Макрон учествува на седмиот самит на јужните земји на ЕУ (Мед7) со лидерите на Италија, Шпанија, Грција, Португалија, Кипар и Малта. Главната тема е зголемувањето на тензиите во регионот.