Манчестер Јунајтед најверојатно ќе мора да ги преиспита плановите за нов модерен стадион со капацитет од 100.000 луѓе. Причината за ова е што грандиозниот проект, кој во моментов грубо се проценува на околу 2 милијарди фунти, има сериозна потреба од државна помош. Сепак, се чини дека клубот нема да добие никакво владино финансирање откако неодамна беше откриена дупка од 22 милијарди фунти во јавните финансии на земјата. Поради нив министерката за финансии на Велика Британија, Рејчел Ривс предложила план за намалување на трошоците, а се очекува и зголемување на даноците. Како резултат на овие шокови, државата ќе си ги скрати евентуалните трошоци кои не се приоритетни во наредните години.
Според „The Sun“, без финансирање од државата, сопствениците на Манчестер Јунајтед ќе мора да ги променат плановите. Можно е да одлучат наместо изградба на нов стадион, да се вратат на опцијата за реконструкција на „Олд Трафорд“, која ќе чини половина од наведената цена. Сепак, оваа реконструкција би можела да потрае дури шест години. Во овој период, доколку не се пресели на друг стадион, тимот ќе мора да игра со значително намален капацитет на стадионот.
Менаџментот мора да донесе финансиски исправна одлука до крајот на годината. Според „The Sun“, клубот анкетирал 30.000 поддржувачи на Јунајтед за тоа дали би сакале клубот да остане на „Олд Трафорд“ или да се пресели на нов стадион. Резултатот е приближно изедначен.