Маск го претстави Грок, „бунтовничкиот“ четбот со вештачка интелигенција: Еве како ќе функционира

од Stefanija Kuzmanovska

Елон Маск го претстави својот нов проект – вештачка интелигенција наречена Грок. Овој бот со вештачка интелигенција е првиот производ од компанијата на Маск xAI и моментално се тестира со ограничена група корисници во САД.

Според официјалното соопштение на компанијата, Грок користи податоци од X платформата на Маск, порано позната како Твитер, што му дава ажуриран приказ на светските настани во споредба со другите чет-ботови кои користат статични збирки на податоци.

Грок: Вештачка интелигенција со „бунтовнички дух“

Грок, според веб-страницата на компанијата, е дизајниран да одговара на прашања со одредена доза на духовитост и има „бунтовнички“ карактер. Во соопштението се наведува дека веќе во тест фаза, Грок покажал супериорност во однос на ChatGPT 3.5 во неколку репер тестови.

Грок е резултат на два месеца интензивен развој и ќе биде достапен за сите корисници на X Premium+ по завршувањето на фазата на тестирање. Маск зборува за неговата амбиција да ја развие платформата X во апликација која ќе вклучува различни услуги, слични на апликацијата WeChat во Кина. Грок ќе биде клучен дел во развојот на овој план, додека xAI, иако е посебна компанија, планира тесно да соработува со X, Tesla и други потфати.

Претходно оваа година, Маск беше еден од потписниците на петицијата со која се повикува на пауза во напредокот на моделите со вештачка интелигенција, со цел да се развијат заеднички безбедносни протоколи. „Го потпишав тоа писмо знаејќи дека е залудно“, напиша милијардерот на Твитер.

„Само сакав да биде забележана мојата препорака за пауза“, објасни тој.

Неодамна, американскиот претседател Џо Бајден потпиша извршна наредба за надгледување на вештачката интелигенција, со цел да се постават стандарди за заштита на безбедноста и приватноста. Темата беше предмет на дискусија меѓу лидерите на технолошкиот сектор и академиците на самитот за безбедност на вештачката интелигенција во Велика Британија минатата недела.

Слични содржини