Илон Маск уште еднаш предизвика лавина реакции откако на социјалните мрежи објави фотографија од внатрешноста на седиштето на ЦИА, локација која вообичаено е строго забранета за јавноста. На фотографијата се гледа како Маск стои во големото лоби на зградата на ЦИА во Вирџинија, на познатиот гранитен печат на Агенцијата од 16 метри. Во неговото друштво има едно лице, што дополнително го зголеми чувството на мистерија околу објавата.
Маск не приложи никаков коментар или објаснување на објавата, што веднаш предизвика бројни теории на заговор и прашања од корисниците на Интернет. „Зошто ви е дозволено да бидете во зградата на ЦИА?“ праша еден корисник. „Не знаев дека сте разузнавач или член на Конгресот. Како сте воопшто таму?“ додаде друг.
Имаше и такви кои се шегуваа. „Не е првпат странец да влезе меѓу нив“. Друг сподели дека фотографијата го потсетува на филмот „Човек во црно“ и објави и сцена од филмот.
Инаку, според официјалните правила на ЦИА, пристап до седиштето им е дозволен само на вработените во Агенцијата, додека јавните посети се строго забранети. Ниту музејот на ЦИА не е отворен за јавноста.
Исто така, мобилните телефони, фотоапаратите или какви било дигитални уреди не смеат да влезат во седиштето, а оние што ќе ги донесат мора да ги остават во возилото или да ги предадат на обезбедувањето на влезот.
Оваа ситуација доаѓа откако Маск ја доби титулата „специјален вработен“ во Одделот за владина ефикасност (DOGE), со одлука на претседателот Доналд Трамп. Иако Белата куќа тврди дека Маск нема формално овластување да донесува владини одлуки, критичарите предупредуваат дека неговата улога дава впечаток на вистинска моќ.
Освен што е обвинет за кратење на хуманитарни и социјални програми, Маск претходно најави дека неговата „јавна служба“ ќе трае само 130 дена и дека планира да се повлече до крајот на мај.
И покрај официјалните изјави дека Маск нема пристап до клучните воени информации, како што се плановите во случај на војна со Кина, соопштението од ЦИА дополнително ги подгреа сомнежите за неговото вистинско влијание на врвот на американската политика.