Руските власти во понеделникот препорачаа руските туристи кои беа блокирани на Крим по нападот на мостот што го поврзува анектираниот полуостров со Русија, да се вратат дома преку украинските територии под руска окупација.
Во нападот што го извршија украинските сили во понеделникот вечерта, загинаа двајца цивили кои со автомобил го минуваа тој мост. Комерцијалните летови меѓу Москва и Крим беа прекинати по почетокот на офанзивата во Украина, а повеќето руски туристи доаѓаат на полуостровот со автомобили преку делот од мостот наменет за патен сообраќај. Тој дел од мостот е делумно оштетен во нападот.
„Ги замолувам жителите и гостите на полуостровот (…) од безбедносни причини да изберат алтернативен копнен пат кој минува низ новите области“, рече рускиот гувернер на анектираниот полуостров, Сергеј Аксјонов, користејќи ја терминологијата на Москва за означување области под контрола на руската војска во источна Украина.
Предложениот пат од 400 километри минува низ некои области каде што се водат борби со бомбардирањето на украинската армија на руските рути за снабдување. Руската телевизија објави мапа на рутата што минува низ градовите Мелитопол, во областа Запорожје, на југот на Украина, и Мариупол, голем пристанишен град уништен од гранатирање, до Ростов на Дон, на југот на Русија.
Владимир Салдо, началникот на руската контрола на делот на јужната украинска област Херсон, кој беше назначен од руските власти, рече дека полицискиот час ќе биде скратен за да им се овозможи на патниците да поминат и дека руската војска ќе ја зголеми безбедноста. Тој предупреди дека ќе бидат поставени контролни пунктови за да се спречи „саботажа“, но дека формалностите ќе бидат намалени.