Пратеничката група на Левица во текот на неделава ќе поднесе Предлог закон за формирање на Инспекторат за употреба на грбот, знамето и химната на државава и на знамињата на заедниците во земјава што ќе даде механизам за спроведување на веќе постојните закони и законска материја, најави пратеникот Амар Мециновиќ.
-Веќе 27 години постои Закон за употреба на државното знаме и грб, но нема орган кој го спроведува овој закон. Исто така постои закон за знамињата на заедниците и тој закон пропишува глоби, но нема институција која ги изрекува тие глоби. Практично имаме мртво слово на хартија, а во меѓувреме сме сведоци на секојдневно непочитување на државните симболи особено за време на јавни прослави, спортски манифестации, па дури и на официјални церемонии, рече Мециновиќ од Левица на денешната прес-конференција во Собранието.
Според него, МВР повеќе реагира на сквернавење на државните симболи, а не влегува во канцелариите на градоначалниците каде што нема македонско знаме.
-Дали МВР влегува во канцеларии каде што имаме американско, француско, германско, албанско, сите знамиња на светот, а нема македонско знаме? МВР не реагира во тој случај и затоа практично треба да се формира еден Инспекторат кој ќе ја следи доследната примена на оваа законска материја и затоа сметаме дека ова само ќе го пополни правниот ваакум кој постои, додаде Мециновиќ, навестувајќи дека со Инспекторатот би ја следел правилната употреба и кај приватните ентитети.
-Толку не се почитуваат државните симболи што изрелативизирана е нивната употреба – оставено е на добрата волја на поединци, правните лица и државните институции дали ќе го следат овој закон, посочува тој.
Мециновиќ очекува поддршка од сите партии за гласање на предложениот закон.