Во контрареплика упатена до министерот Тимчо Муцунски, Мециновиќ изјави дека ситуацијата не може да се сведува на термин „конфликт“, туку претставува чин што бројни држави и меѓународни институции го квалификуваат како геноцид.
„Ова не е само конфликт. Ова е окупација и агресија, а многу држави и институции го признаваат тоа и како геноцид. Тоа се гледа и во постапките кои се водат пред Меѓународниот суд на правдата“, рече Мециновиќ.
Тој ја обвини владата дека со игнорирање на Палестинските власти и фокусирање единствено на Хамас, Македонија практично зазема страна во конфликтот – на страната на Израел.
„За вас како дипломат можеби е проблематичен Хамас, но за граѓаните на Македонија и светот, на нашите телефони гледаме четири HD-геноцида во живо. Ова е асиметричен конфликт и мора да заврши“, порача Мециновиќ.
Пратеникот повторно побара од македонската влада да ја признае државата Палестина и да воспостави дипломатски односи, потсетувајќи дека предложената Декларација на Левица за признавање на Палестина е блокирана во Собранието веќе седум месеци.
„Ако ви е проблем Хамас, поддржете ја легитимната власт на Палестина, признајте ја државата и застанете на страната на мирот“, додаде тој.