Заменик-претседателот на Советот за безбедност на Русија, Дмитриј Медведев, во саботата изјави дека „никој не може да гарантира дека украинскиот главен град Киев ќе го преживее 10 мај“ доколку Украина ја нападне Москва за време на прославата на Денот на победата, на 9 мај.
Изјавата доаѓа откако рускиот претседател Владимир Путин во понеделник прогласи тридневен прекин на огнот, од 8 до 10 мај, по повод 80-годишнината од победата на Советскиот Сојуз и неговите сојузници во Втората светска војна. Примирјето се совпаѓа со традиционалната Парада на победата, на која годинава се очекува да присуствуваат и меѓународни лидери, меѓу кои и кинескиот претседател Си Џинпинг.
Украинскиот претседател Володимир Зеленски одговори дека е подготвен да прифати прекин на огнот, но само доколку истиот трае 30 дена. Тој изрази сомнеж во краткорочни прекини и побара долгорочно решение. Зеленски нагласи дека, поради тековната војна, Украина не може да гарантира безбедност на странски државници кои ќе присуствуваат на парадата во Москва.
„Ние не можеме да бидеме одговорни за тоа што се случува на територијата на Руската Федерација. Тие се одговорни за вашата безбедност и затоа нема да ви дадеме никакви гаранции“, изјави Зеленски.
Медведев, поранешен претседател на Русија и еден од најгласните антизападни гласови во руската политика од почетокот на војната, ја нарече изјавата на Зеленски „вербална провокација“.
„Зеленски добро знае дека, во случај на вистинска провокација на 9 мај, никој не може да гарантира дека Киев ќе го дочека 10 мај“, напиша Медведев на својот официјален канал на „Телеграм“.