Западните земји веќе изградија цела политичка програма врз основа на смртта на рускиот опозициски лидер Алексеј Навални без да ги чекаат резултатите од истрагата. Ова го изјави заменик-претседателот на Советот за безбедност на Русија, Дмитриј Медведев.
Коментирајќи го предлогот на високиот претставник на ЕУ за надворешни работи и безбедност, Жозеп Борел, механизмот за санкции за кршење на човековите права да се именува по Навални, Медведев рече дека тоа е „изненадувачки“ бидејќи западните земји немаат податоци за тоа што се случило.
„Сето ова изгледа неверојатно, бидејќи западните земји сè уште немаат податоци за тоа што се случило. Сепак, сето тоа веќе е претворено во политичка програма, сè е претворено во пропаганда“, изјави Медведев за руските медиуми, пренесува ТАСС.
Коментирајќи ја смртта на Навални, Медведев нагласи дека ваквите трагични настани секогаш предизвикуваат многу различни емоции.
„Погледнете го насмеаното, среќно лице на вдовицата на Навални. Изгледа како да чекаше овој настан да се одигра во нејзиниот политички живот сите овие години. И дури и зборуваше за тоа. Сето ова е тажно, мислам, многу тажно“, додаде тој.
Што се однесува до сопствениот впечаток за Навални, Медведев рече дека има измешани чувства.
„Не можам да кажам ништо добро за него, но нема да кажам ниту лошо“, рече тој.
Повика да не се преувеличува бројот на поддржувачите на Навални, нагласувајќи дека земјата сега се занимава со сосема други прашања.
„Ако има поддржувачи, тоа мора да се земе предвид, но овој фактор не треба да се претерува. Сега земјата живее поинаку“, истакна Медведев.
Тој нагласи дека сега никој не се обидува да се бори против Навални.
„Сега никој не се бори против него, што е разбирливо, бидејќи човекот веќе го нема“, подвлече Медведев.