Пратеничката на ДУИ, Ермира Мехмети, вчера на својот профил на Фејсбук упати жестоки критики кон сопартиецот Артан Груби, нарекувајќи го „хулиган“ и „поттикнувач на конфликти”. Според неа, Груби е еден од виновниците за намалување на авторитетот на партискиот лидер Али Ахмети.
„За жал, нема ништо од реформите во ДУИ. Тоа е нормално кога корумпирани членови и губитници го уриваат и кредибилитетот на лидерот. За едно нешто немам никакви дилеми, а тоа е дека губењето на авторитетот на Ахмети и на партијата почна кога во структурите на ДУИ високо беше лансиран господинот Селфи, хулиганот кој може само да потикнува конфликти, без разлика дали е тоа на стадион или кога носи наметка на политичар“, напиша Мехмети на Фејсбук.
Според Либертас, причина за овој пост биле нарачани прилози на Алсат-М дека Ермира Мехмети ја користи позицијата за да полага нотарски испит, зад кои, според неа, стои шефот на кабинетот на Ахмети, Артан Груби.