Следниот германски канцелар би можел да биде Фридрих Мерц. Неговата ЦДУ е убедливо најсилната партија во Германија. Тој рече дека Европа мора итно да се зајакне во светло на зголемениот притисок од САД под водство на Доналд Трамп.
Говорејќи на прес-конференција по првичните изборни резултати, Мерц ја истакна потребата „да се зајакне Европа што е можно побрзо“ поради неизвесните односи со Вашингтон.
Алудирајќи на новиот мандат на Трамп, Мерц истакна дека американската администрација не се грижи за европскиот континент.
„Интервенциите од Вашингтон беа исто толку драматични, драстични и на крајот скандалозни како и оние што ги видовме од Москва“, рече тој, мислејќи на поддршката на Елон Маск за германската крајнодесничарска партија АФД за време на изборите.
Во објава на социјалните мрежи, Мерц изрази загриженост за растечкото зближување меѓу Русија и САД. Според него, овие сили „се консултираат преку главата на Украина, а со тоа и над главата на Европа“.
Поради сето ова, посочи тој, Европа сега ја гледа Германија и очекува брзо формирање влада која ќе може да одговори на новите геополитички предизвици.
„Мојот впечаток во последните денови е дека Русија и Америка се зближуваат – преку грбот на Украина, а со тоа и над грбот на Европа. Затоа сега сите се фокусирани на Германија. Колку брзо Германците, по овој сложен изборен резултат, можат да формираат влада? Тоа е навистина мојот приоритет во моментов“, напиша тој.