Инженерот на Мерцедес, Ендрју Шовлин, потврди дека тимот „напорно работи“ на надградба на болидот W16, откако стана јасно дека тој заостанува зад болидот на Мекларен.
По првите две трки од сезоната, Мерцедес е втор во поредокот кај конструкторите, додека Џорџ Расел го држи третото место во поредокот кај возачите, со девет поени помалку од лидерот Ландо Норис.
Директорот на тимот Тото Волф по Кинеското ГП изјави дека Мерцедес е „вториот најбрз тим“ на патеката, пред Ферари и Ред Бул Рејсинг, но зад Мекларен во однос на чистата брзина. Сепак, тој додаде дека разликата не е голема, но Шовлин призна дека тимот од Вокинг сепак има предност.
Имајќи го ова на ум, како и фактот дека се возат три трки по ред, Шовлин потврди дека Мерцедес развива надградби за болидот W16 за да извлече најдобри можни перформанси.
„Работиме напорно за да донесеме надградби на болидот, чувствуваме дека треба да го намалиме тој јаз во однос на Мекларен“, рече тој.
Трката за ГН на Јапонија се вози во недела на 6-ти април.