Американскиот претседател Џо Бајден ќе ја пречека германската канцеларка Ангела Меркел во Белата куќа во надеж дека ќе се обноват врските кои беа раскинати за време на мандатот на Доналд Трамп.
Посетата на Меркел на Белата куќа, која е прва на европскиот лидер откако Бајден ја презеде должноста во јануари, покажува дека САД се обидуваат да ги подобрат односите со сојузник кој честопати претрпувал напади за време на мандатот на Трамп, проценува „Ројтерс“.
Иако Соединетите држави и Германија се клучни сојузници на НАТО, тие се расправаат околу низа тешки прашања, вклучително и гасоводот „Северен тек 2“ што се гради од Русија до Германија под Балтичкото Море, за што Вашингтон стравува дека ќе ја зголеми зависноста на Европа од рускиот гас.
Тие, исто така, не се согласуваат околу економската соработка со Кина, континуираното ограничување на патувањето во Соединетите држави од Европа и противењето на Германија за привремено одрекување од патенти насочено кон забрзување на производството на вакцини за ковид 19.
Од друга страна, Бајден и Меркел се очекува да разговараат за „здружување на силите во борбата против заканите за демократијата ширум светот, сузбивање на руските сајбер напади и, како што тие гледаат, „територијална агресија во Источна Европа и обидите на Кина да доминираат во напредната технологии“.
Завршувањето на пандемијата и ублажувањето на ефектите од климатските промени исто така ќе бидат на дневен ред.