Ја слушнав изјавата и морам да кажам дека кај господинот Ковачевски проработел Фројд. Можеби поради тоа прави споредба со тие мали работи. Би го советувал дека тие мали работи кои го фрустрираат, не треба да го фрустрираат, рече лидерот на ВМРО-ДПМНЕ, Христијан Мицкоски, коментирајќи ја неодамнешната изјава на премиерот Димитар Ковачевски.
Според Мицкоски, „премиерот уште малку време ќе остане на функцијата“.
-Некои мали работи кои претставуваат негова лична фрустрација, ќе мора цел живот да ги носи, додаде претседателот на ВМРО-ДПМНЕ при посетата на општина Кисела Вода.
Ковачевски во интервју пред два дена порача дека во најголемата опозициска партија има мал и голем Груевски.
-Кога ќе ги погледнете ставовите, ќе видите дека таму (во ВМРО-ДПМНЕ) се работи за мал Груевски и голем Груевски, бидејќи немаат различни политички ставови во однос на изолацијата на државата. Јас не можам да се мешам во друга политичка партија, меѓутоа, курсот што го имаат воопшто не се разликува од тоа што беше пред 11 години, ја држеа државата во изолација, кажа Ковачевски.