Откако Европската конфедерација на синдикати излегоа со став дека ќе ја известат Европската комисија дека Владата прави притисок за да не се зголемат платите и дека целиот случај ќе го стават под мониторинг, премиерот Христијан Мицкоски вели дека би ги поканил претставниците и да ги слушнат аргументите. Според него, би било незрело само врз основа на еднострана информација да носат заклучоци.
-Би ги советувал да ги слушнат сите страни и тогаш да зборуваме за заклучоците. Доколку информацијата е еднострана, а сигурен сум дека ќе сакаат да ја слушнат и втората страна, дебата и заклучоците би биле поинакви. Но, ако го слушате претпоследниот браник на интересите на СДСМ, а тоа е она момче претседател на ССМ кое што излегува заедно со малкумина судии и обвинители, тогаш да, ако носите врз основа на тоа заклучок, да. Заклучокот треба да се темели врз основа на аргументи од двете страни. Ако треба и ние ќе појдеме, за да ги претставиме нашите аргументи, рече премиерот за конфликтите и обвинувањата на релација централна власт-синдикатите.
Европската конфедерација на синдикатите чиј полноправен член е Сојузот на синдикатите на Македонија преку механизмите кои ги има на располагање, најави дека ќе ги информира и европските институции за состојбите и случувањата во земјава.