Претседателот на ВМРО-ДПМНЕ, Христијан Мицкоски, на настан во Делчево, истакна дека повеќе од 80 проценти од македонскиот народ е против прифаќањето на она што тој го нарекува “бугарски диктат”, и дека неговата партија нема да се согласи со промена на Уставот под овие услови, ниту сега, ниту во иднина. Тој изрази увереност дека пратениците на ВМРО-ДПМНЕ и коалицијата нема да подлегнат на притисоци преку повици за средби и поединечни разговори.
Мицкоски најави дека ќе присуствува на најавената лидерска средба, бидејќи смета дека е потребно да се учествува во разговорите за иднината на Македонија. Исто така, изрази сомнеж дека ќе има значајни промени на оваа средба, но сепак реши да присуствува. Тој изрази и загриженост за времето откако уставните промени ќе пропаднат и изјави дека премиерот треба да биде свесен за последиците. Според Мицкоски, некој сака да ги негира македонскиот јазик, историја и постоење, а тоа негирање доаѓа од земја членка на Европската унија.
На настанот, исто така се обратија претседателот на Општинскиот комитет на ВМРО-ДПМНЕ во Делчево, Иван Гоцевски, и градоначалникот на Пехчево, Александар Китански.