Мик Џегер има корона, Стоунси го откажаа концертот во Амстердам

од Nikola Popovski

Ролинг Стоунс го откажаа концертот во Амстердам само неколку часа пред да започне, откако пејачот Мик Џегер беше позитивен на Ковид-19.

Бендот во соопштение објави дека го откажува концертот, наведувајќи дека 78-годишниот Џегер бил тестиран позитивен бидејќи ги почувствувал симптомите на Ковид-19 по пристигнувањето на стадионот, во предградието на Амстердам. Не дадоа дополнителни информации за неговата состојба.

„Ролинг Стоунс многу жалат за вечерашното откажување, но безбедноста на публиката, колегите музичари и вработените на турнејата мора да биде приоритет“, се вели во соопштението.

Се додава дека ќе биде одреден нов датум за концертот и дека за тој нов датум ќе важат билетите за вечерашниот настап во арената Јохан Кројф во Амстердам.

Некои фанови веќе беа на стадионот кога беше објавено дека концертот е откажан.

Ролинг Стоунс се на европска турнеја наречена „Шеесет“ (Sixty) за да одбележат шест децении заеднички настапи и свирки. Нивниот последен концерт на оваа турнеја беше во Ливерпул на 9 јуни. Следниот закажан концерт е во Берн, Швајцарија на 17 јуни.

Слични содржини