Претседателот на Црна Гора, Јаков Милатовиќ, ја изрази својата целосна поддршка на државните органи во борбата против организираниот криминал и корупцијата.
Тој им изјави на новинарите во Мартиниќи по прославата на 227-годишнината од битката кај Мартиниќ, коментирајќи го апсењето на поранешниот началник на полицијата Веселин Вељовиќ. Милатовиќ најави дека следната недела ќе почнат консултациите за мандатот за состав на новата влада.
„Целосна поддршка на правосудните институции да си ја завршат работата. Нивната работа е токму борбата против организираниот криминал и корупцијата. За жал, ми се чини дека ова последно апсење зборува, со презумпција на невиност, за тоа какви луѓе во претходниот период имале значително високи функции во Црна Гора“, рече Милатовиќ.
Тој изјави дека „тие кои требаше да се борат против криминалот и корупцијата се чини дека честопати биле главниот дел од организираниот криминал и корупцијата“.
Милатовиќ рече дека неговата позиција не е задолжителното враќање на воениот рок.
„Проблемот што во моментов го има црногорската армија е недоволната екипираност, а тоа укажува дека нашата армија е недоволно атрактивна. Што се однесува до воениот рок, знаете дека има различни практики во светот, мојот став е да не се врати задолжителниот воен рок, но дефинитивно треба да ја отвориме таа тема“, рече Милатовиќ.