Милошоски: ВМРО-ДПМНЕ вели „да“ за ЕУ, но „не“ за уцена од Бугарија

од Nikola Popovski

ВМРО-ДПМНЕ вели „да“ за ЕУ, но „не“ за уцената од Бугарија, која не дава никаква сигурност дека процесот на европска интеграција нема да биде блокиран повторно и повторно поради ирационалните прашања што очигледно сè уште ги има кон Македонија, рече пратеникот на ВМРО-ДПМНЕ и поранешен министер за надворешни работи Антонио Милошоски во изјава за медиумите по денешната средба во Собранието на министрите од „Вајмарската тројка“ со пратениците од најголемата опозициска партија.

Според Милошоски, „властите се свесни дека ги немаат гласовите на две третини од пратениците да го прифатат она што тие самите, без национален консензус, лековерно го зеле како обврска, како наметнати уставни измени по барање на Бугарија“.

Францускиот државен секретар за Европа во Советот на министри Лоренс Бун, германската министерка за Европа и клима Ана Лирман и полскиот министер за ЕУ ​​Шимон Шчињковски вел Сенк го посочија примерот на „недоразбирањата и конфликтите меѓу некои од нив кои се решени со европската интеграција, рече Милошоски и додаде дека разликата е во тоа што Германија не бара начин да ја блокира Полска во преговарачкиот процес со ЕУ.

Разликата на Балканот е во тоа што земјите-членки на ЕУ во регионот, во случајов Бугарија и Грција, а во поширок план и Хрватска, бараат начини одредени недоразбирања да станат пречка или причина за вето и блокирање на процесот на евроинтеграции, кажа Милошоски и посочи дека „кога се преземаат заложби за кои е потребен консензус, консултациите се прават пред, а не на крајот на процесот“.

Според него, проблемот со Бугарија е ирационален и апстрактен, а земјата добила ветувања кои не се исполнети.

Северна Македонија и во други прилики беше посетена од високи делегации. Во 2018 година ни беше ветено дека откако ќе се смени името, ќе ни се отворат вратите на ЕУ, а тоа не се случи. Франција не блокираше поради промена на методологијата, а од Бугарија добивме вето за нешто што тие не го поставуваа како прашање во претходните 30 години, порача пратеникот.

Министрите од Германија, Франција и Полска од вчера се во Скопје кога остварија средби со премиерот Димитар Ковачевски, со претседателот Стево Пендаровски, со раководството на ВМРО-ДПМНЕ и најголемата албанска партија ДУИ. Денеска се средбите со координаторите на пратеничките групи и со претседателот на Собранието, Талат Џафери.

Ова е втора тројка министри од земјите на ЕУ кои пристигнуваат во земјава за да разговараат за обврските вклучени во преговарачката рамка што Македонија мора да ги исполни, со акцент на уставните измени за кои владеачкото мнозинство ги нема потребните гласови во парламентот.

Слични содржини