Министрите за социјална политика од регионот потпишаа денеска во Белград заедничка Декларација за унапредување на социјалната политика на Западен Балкан со која се обврзаа на заедничко дејствување за да се спроведат реформи во таа област.
Министерот за труд на Србија Зоран Ѓорѓевиќ изјави дека соработката на проекти со решавање на истите или слични проблеми што ги имаат тие држави, може да значи поврзување „за да може утре сите заедно да влеземе во ЕУ“.
Во Декларацијата се наведува дека потписниците се обврзуваат „да здружат напори во борбата против социјалната исклученост и дискриминација, во промовирање социјална правда и заштита, зголемена еднаквост меѓу мажи и жени и поттик за солидарност меѓу генерации и заштита на правата на детето“.
Иницијативата за социјална димензија при евроинтеграциите на Западен Балкан чија цел е воспоставување и унапредување дијалог меѓу цивилниот сектор, граѓаните и политичките елити во ЕУ и регионот ја финансира и спроведува германската невладина органзиација АБС (Arbeiter Samariter Bund). Иницијативата е покрената за да може во следните 18 месеци да се креира портфолио од 165 предлози во областа на социјалната запштита.