Претседателот на Европскиот совет, Шарл Мишел, најави дека на маргините на самитот во Гранада ќе се разговара за актуелната ситуација на Косово и посочи дека насилството не е прифатливо и оти дипломатијата и дијалогот се единствениот начин за решавање на проблемот, пренесува „Коха“.
„Насилството не е прифатливо. Важно е лидерите на земјите од Западен Балкан да разберат дека за интеграција во Европската унија, покрај неопходните реформи, услов е и решавањето на билатералните несогласувања. Несогласувањата меѓу Косово и Србија, исто така, треба да се решат како услов за интеграција во ЕУ“, рече Мишел.
Како што јави „Косово онлајн“, Мишел порачал дека ЕУ, НАТО, САД и партнерите се едногласни во ставот дека насилството нема да се толерира.
„Мораме да ги убедиме лидерите во регионот дека насилството нема да се толерира и дека дипломатијата и дијалогот се единствениот начин за решавање на проблемот. Кога има тензии тоа лошо се одразува на инвестициите во регионот и е на штета на земјите од регионот“, рече претседателот на Европскиот совет.
Според него, либерализацијата на визите за граѓаните на Косово, која ќе почне да се применува од први јануари следната година, претставува одлука на посветеноста на ЕУ кон нив.
Тој наведува и дека што се однесува до одлуките за Косово во процесот на проширување, „тоа ќе зависи од извештајот на Европската комисија“.
Тој го изрази своето задоволство што неговиот предлог е да се постави 2030 година како краен рок и за ЕУ и за земјите кои целат кон членство да бидат подготвени за проширување.
„Овој рок е амбициозен, но и реален“, рече Мишел, додавајќи дека му е драго што откако го спомена овој рок, тој стана рамка околу која сега се одвива целата дебата за проширувањето на ЕУ.
Претседателот на Европскиот совет рече дека прашањето за проширувањето ќе се разговара неформално на самитот во Гранада, но конкретни одлуки за овој процес се очекуваат на официјалниот самит во Брисел во декември, кога ќе биде одржан и самитот на ЕУ со Западен Балкан.