Меѓународна мисија предводена од Светската здравствена организација (СЗО) ќе замине во Вухан, Кина, во првата недела од јануари да го испита изворот на коронавирусот. Меѓународните експерти ќе одат во Кина во шестнеделна мисија, а ќе бидат во двонеделен карантин по пристигнувањето во најнаселената земја во светот.
Кина официјално го објави првиот случај на вирусот на 31 декември минатата година и веднаш го затвори пазарот во Вухан, за кој многумина веруваат дека е извор на инфекцијата, потсетуваат новинските агенции.
Министрите за здравство од голем број земји го повикаа СЗО да го идентификуваат изворот на вирусот и како тој се пренесува од лилјак на човек.
Во моментов, тим од 12 до 15 меѓународни експерти се подготвува да замине во Вухан за да ги испита доказите, вклучувајќи примероци од луѓе и животни собрани од кинески научници, врз основа на кои ќе направат студија.
„Една фаза требаше да биде завршена досега, врз основа на информациите што ги имаме, и треба да видиме некои резултати. „Ако тоа се случи кога ќе дојдеме во Кина, тоа ќе биде фантастично, бидејќи ќе можеме веднаш да влеземе во втората фаза“, изјавила Теа Фишер, член на тимот на СЗО од Данска, за Ројтерс.
САД, кои ја обвинија Кина дека го крие извештајот за почетоците на коронавирусот, повикаа на „транспарентност“ во истрагата на СЗО и ја критикуваа Кина што најпрво им дава можност на своите научници да спроведат прелиминарна истрага.
Кинеските државни медиуми тврдеа дека Ковид-19 постоел во странство пред да биде откриен во Вухан, повикувајќи се на присуство на вирусот на пакувања замрзната храна, а некои научни списанија тврдат дека Ковид-19 циркулирал во Европа уште минатата година.