Претседателот на НСДП и се уште актуелен потпретседател на Собранието, Горан Мисовски информира дека неговата партија освоила две пратенички места на парламентарните избори.
-Ќе делуваме опозициски, а за начинот како организациски ќе функционираме, ќе одлучат органите на партијата после конститутивната седница, рече Мисовски во кратка изјава за „Локално“.
Покрај него, и Соња Мираковска е избрана за пратеник во новиот состав на Собранието од редовите на НСДП.
Ваквата реакција следува откако анонимни профили на социјалните мрежи и дел од медиумите објавија дека пратеници од партијата која беше дел од заедничката Коалиција за европска иднина, ќе се придружат на парламентарното мнозинство на ВМРО-ДПМНЕ кое веќе брои 58 пратеници.
Претходно и од ЛДП демантираа дека ќе бидат дека ќе делуваат на ист бран со новата владеачка партија. Лидерката на партијата, Моника Зајкова порача дека таквите објави на социјалните мрежи се „нарачки од партиски ботови“.
-Имаше такви кои агитираа и работеа против сопствената партија и денес прават повторно притисок. Нашата цел и насоченост во моментот е прегласувањето во ИЕ 5 каде има 3521 избирач. Големи шанси за мандат има и кандидатот од ЛДП, доколку неговата коалиција освои 110 гласови повеќе од сегашниот резултат, тогаш пратеник би станал Боби Мојсоски, а би отпаднал Исмаил Јахоски од ДУИ. Затоа и повикувам да се воздржат од шпекулации и во среда да се гласа за број 1, кажа Зајкова во изјава за „Локално“.
Мисовски кон крајот на март во просториите на СДСМ, со Димитар Ковачевски и другите претседатели на коалициските партнери потпиша коалициски договор со што формално се формира предизборната коалиција.
Лидерот на ВМРО-ДПМНЕ и иден македонски премиер Христијан Мицкоски вчера изјави дека преговорите за формирање ново парламентарно мнозинство и заедничка влада со коалицијата ВЛЕН одат во вистинска насока и дека тие веќе имаат мнозинство од најмалку 61 пратеник, не сакајќи да соопшти повеќе детали.
Н.П.