Капитенот на Реал Мадрид, Лука Модриќ изјави дека неговиот тим не очекувал тежок пораз во финалето на шпанскиот Суперкуп, но дека Барселона заслужено победила со 5:2.
„Не очекувавме вака да загубиме, но тоа е фудбалот“, изјави 39-годишниот Модриќ во обраќањето пред новинарите по натпреварот одигран во Саудиска Арабија.
„Уверен сум дека ќе знаеме како да реагираме по толку тежок пораз“, додаде тој.
Тој истакна дека му е жал за навивачите, но дека и самите играчи биле тажни.
„Мораме да останеме обединети, бидејќи сезоната е долга“, рече тој.
Со 28 освоени трофеи, Модриќ е најодликуваниот играч во историјата на Реал Мадрид, а првата титула ја освои во 2012 година во финалето на шпанскиот Суперкуп, победувајќи ја Барселона. Реал Мадрид лани во финалето на тоа натпреварување ги совлада Каталонците со 4-1, но во неделата вечерта Барселона славеше убедливо.
„Така е во фудбалот. Фудбалот се состои од порази и победи. Изгубивме денеска и толку. Не можете секогаш да победувате“, рече играчот од средниот ред.
Модриќ во игра влезе во 64. минута.
„Ако треба да ја загубиме титулата во кое било натпреварување, тогаш подобро е ако загубиме во Суперкупот, иако никогаш не е лесно да загубиш од најголемиот ривал“, рече тој.
„Треба да и честитаме на Барселона бидејќи одиграа многу добар натпревар и беа подобри. Мораме да продолжиме да работиме и да го исправиме она што го згрешивме“, додаде тој.
Реал Мадрид имаше играч повеќе од 57 минути, но и покрај тоа не му се закани сериозно на противникот.
Модриќ одговори дека неговиот тим не играл добро, но е уверен дека ќе им пружи големо задоволство на навивачите до крајот на сезоната.
„Во последно време сме во добра форма во првенството. Мора да продолжиме вака“, заклучи тој.
На половина од сезоната, Атлетико Мадрид води во шпанското првенство со 44 бодови, пред Реал Мадрид со 43 и Барселона со 38 бодови.
Реал Мадрид загуби со 0:4 од Барселона во првенството на крајот на октомври како домаќин, а претходно загуби со 1:2 за време на летниот тренинг камп во САД.
„После тоа се однесувавме како тим, бевме обединети и излеговме од тоа“, изјави Модриќ за тогашниот првенствен пораз.
„Верувам дека тоа ќе биде случај сега. Исто така, добро е што наскоро ни претстои натпревар од Купот за да немаме време да жалиме“, додаде тој.
Реал Мадрид во четврток игра против Селта Виго во осминафиналето од Купот на Шпанија.