Генералниот секретар на НАТО Јенс Столтенберг во разговор со словачкиот вицепремиер Роберт Калинак порачал дека нападот врз премиерот Роберт Фицо е напад врз демократиите и отворените општества.
Столтенберг на платформата „Х“ напишал дека во разговорот со Калинак изразил солидарност со премиерот Фицо и народот на Словачка.
– Мораме заедно да застанеме и да ги одбраниме нашите вредности, навел Столтенберг.
Словачкиот претседател Петер Пелегрини соопштил дека Фицо и понатаму е во сериозна, но стабилна состојба и дека може помалку да зборува.
– Може да зборува, но само неколку реченици и прилично е уморен со оглед на тоа дека што прима лекови, изјавил Пелегрини кој го посети Фицо во болница.
Тамошната полиција ја отфрли можноста осомничениот атентатор да е дел од радикална група и го опишува како волк-самотник.
Од светот пристигнуваат осуди, а од Словачка заклучок – ова е резултат на поделено општество. Во мотивите неофицијално се вклучени и ставот на Словачка кон војната во Украина и намерата на владата да го зароби јавниот сервис. Заседавале тамошниот Совет за безбедност и словачката Влада, при што одлучиле да не се воведе вонредна состојба на територија на државата туку да се зајакне безбедноста на официјалните преставници и загрозените категории.