Светското првенство почна со огномет на свеченото отворање, а можеше да заврши со огномет со голови во мрежата на домаќинот Катар.
Во првиот натпревар на Светското првенство на стадионот „Ал Бајт“, селекцијата на Еквадор победи со 2:0, а победата можеше да биде и поубедлива.
Херој на еквадорските навивачи беше двојниот стрелец Енер Валенсија, кој погоди во 16. и 31. минута.
Навивачите на стадионот добро се забавуваа, но во фан зоната во центарот на Доха настана гужва и судири со полицијата, а се уште не се знае дали има повредени.
Светското првенство ќе трае до 18 декември, а титулата ја брани француската селекција која поради повреда ќе настапи без најдобриот стрелец Карим Бензема.
Ова е прво Светско првенство во историјата што се одржува на Блискиот Исток, а во месеците пред почетокот на турнирот, властите во Катар се на удар на критики поради нивниот третман кон ЛГБТ луѓето и работниците мигранти кои ги градеа стадионите.
Како помина церемонијата на отворање?
На церемонијата учествуваше познатиот американски актер Морган Фримен, кој меѓу другото рече дека фудбалот ги „зближува народите и заедниците“.
„Постои заедничка нишка на надеж, радост и почит“, истакна Фримен.
На теренот се појави и Ганим Муфтах, млад човек без нозе кој се занимава со екстремни спортови како нуркање, скејтборд и качување.
Јужнокорејската суперѕвезда Јунг Кук ја отвори музичката програма и заедно со локалната ѕвезда Фахад Ал Кубаиси ја отпеа песната „Dreamers“.
На стадионот беа сите маскоти од светските првенства, како и маскотата на ова натпреварување Леиб.
Неговото значење е „супер-вешт играч“ и е инспириран од катарската традиција.
Свеченото отворање заврши со обраќање на емирот на Катар, Тамим бин Хамад Ал Тани, по што следеше огномет.
„Работевме толку напорно за да го направиме овој еден од најуспешните настани во светот. И конечно сме тука, во добро расположение. Следните 28 дена заедно со остатокот од светот ќе го следиме овој неверојатен настан слушајќи се еден со друг под овој покрив. Единствениот покрив што не зближува сите нас, со сите наши разлики, култури и верувања“, рече тој.
Што велат навивачите?
Хаотични сцени беа забележани во фан зоната во центарот на Доха, додека десетици илјади луѓе се тепаа со полицијата за да влезат во областа и да го проследат првиот натпревар на Светското првенство во Катар.
Полицијата, вооружена со палки и штитови, го обезбедуваше влезот, а некои навивачи ја молеа полицијата да ги пушти.
„Ова е многу ризично, луѓето би можеле да умрат. Старите, жените, не можат да се справат со овие гужви. Фала му на Бога што сум висок за да можам да дишам во толпата. Но, видов некои деца и им реков да ги земат за да можат да дишат“, изјави за АП Ирачанецот Хатем Ел-Берари, посетител и фудбалски навивач.
Тој додал дека видел луѓе како се туркаат и жени како плачат.
„Моето семејство е внатре. Не можам да влезам да ги видам, не знам што да правам“, рече тој.
Засега не се знае дали има повредени или уапсени.
Даниел Орт од Холандија, облечен во портокалова, изјави за Ројтерс дека чувствува постојан притисок да не каже или направи „нешто погрешно“.
Тој додава дека засега „не е забавна атмосфера“ на Светското првенство.
Аргентинецот Жулио Цезар, сепак, очекува одлична атмосфера.
„Ќе пиеме пред натпреварот“, рече тој коментирајќи ја одлуката на ФИФА на два дена пред почетокот на турнирот да не се продава алкохол на стадионите.
Навивачите без проблем можеа да консумираат пијалок во центарот на Доха каде ФИФА организираше навивачки фестивал.
На периферијата на градот стотина работници се собраа во спортски сали во индустриска зона каде што нема алкохол.
Овде можат да гледаат натпревари, наместо на скапите стадиони во кои учествувале.
„Секако дека не купив билет. Тие се скапи, а парите ќе ги искористам за други работи, за да ги испратам на моето семејство дома“, изјави за Ројтерс Касим од Гана, чувар кој живее и работи во Катар веќе четири години.
Работниците го поставуваа крајниот допир на пејзажот на Доха, поставувајќи виолетови церади над недовршената зграда во близина на стадионот каде што ќе се игра финалето.
Во трговскиот центар Лагуна, жителите се занимаваа со својот бизнис.
„Дојдов сега затоа што не знам колку ќе биде лош сообраќајот подоцна оваа недела“, вели Есра, Египќанка која отишла да купува намирници.