Имаме коректни односи со Русија, вели министерката за одбрана, Славјанка Петровска на прашањето за реципроцитет во однос на протерувањето на руски и македонски дипломати.
Петровска објаснува дека како држава имаме обврска и кон сите пријателски земји да си ја гарантираме и чуваме сопствената безбедност и сигурност и да ги штитиме сопствените национални интереси.
-Секогаш кога некој од службите ќе добие информација дека некој постапува вон процедурите има обврска за дејствија. Протерувањето на дипломати е коректен чин и постапено е согласно позитивните прописи и интереси на земјата. Воопшто не треба некој да ни замери за тоа, смета Петровска во гостувањето на емисијата „24 анализа“, додавајќи дека прашањето на реципроцитет е воспоставено во дипломатијата.
Минатата година Македонија протера двајца руски дипломати, како „мерки за заштита на својата национална безбедност, меѓутоа и безбедноста на сојузниците во сојузот во којшто припаѓаме“, изјави тогаш министерот за надворешни работи, Бујар Османи.
Русија возврати и на 10 јуни 2021 година соопшти дека дипломат вработен во Амбасадата на Северна Македонија во Москва е прогласен за непожелна личност.