МотоГП тимот на Хонда официјално го потврди потписот на светскиот шампион од 2020 година во кралската класа, Жоан Мир. Шпанецот ќе биде партнер на шесткратниот шампион Марк Маркез, кој се очекува да се врати на гридот по долго отсуство поради повредата што ја заработи на ГН на Шпанија во 2020 година.
Иднината на Мир во МотоГП беше доведена во прашање претходно оваа година, откако неговиот сегашен тим Сузуки одлучи да се повлече од шампионатот на крајот на годината. Гласините брзо го поврзаа со позицијата во Хонда и по неколкумесечни шпекулации, неговиот трансфер е официјално потврден.
Сегашниот тимски колега на Мир од Сузуки, Алекс Ринс, исто така најде засолниште во кампот на Хонда, но тој ќе се трка за сателитскиот тим ЛСР Хонда. Таму очекувањата се дека ќе добие целосно фабрички подготвена машина каква што ќе имаат Мир и Маркез.
Договорот на Мир со тимот на Хонда ќе биде на две години, што значи дека ќе вози за јапонскиот производител и во сезоната 2024 година.