Според министерот за надворешни работи и надворешна трговија, Тимчо Муцунски, не е потребна промена на преговарачката рамка на земјата со ЕУ за да се имплементира моделот што владата во Скопје го посакува за одложено дејство на промените во Уставот кои би стапиле на сила откако земјата ќе стане членка на ЕУ.
„Не го делам целосно ставот дека за моделот на одложна примена на уставните измени се потребни промени на преговарачката рамка и заклучоците. Тоа е прашање на правно толкување, јас сум застапник на ставот дека тоа може да се направи без никаква промена“, рече Муцунски на прес-конференција по средбата со министерот за надворешни работи на Италија, Антонио Тајани, кој вчера беше во Скопје.
Според него, ако постои добра волја од страна на земјите-членки на Европската унија, нема предизвик што не може да се реши.
„Наша цел е прво да имаме предвидлив пат кон европската интеграција и второ да ја браниме политиката на проширување на вредностите и принципите. Колку и да делувам репетативен, пак ќе кажам, верувам дека со овој одложен пристап на дејствување (на уставните измени) го штитиме нашиот национален интерес како влада да не бидеме понижувани, да не се доведуваме во ситуации какви што бевме доведени од нашите соседи и второ, да се осигураме дека патот напред кон полноправно членство ќе се заснова на стандардите и критериумите на ЕУ“, кажа шефот на македонската дипломатија.
Услов за вистински почеток на преговорите на Македонија со ЕУ, вклучени во преговарачката рамка, се измените во Уставот, со кои Бугарите во земјава ќе бидат вклучени во основниот закон.