Не го делам мислењето (дека Македонија ја условува ЕУ). Процесот на интеграција на било која земја-кандидат се прави со наше барање, изјави денеска министерот за европски прашања, Орхан Муртезани одговарајќи на новинарски прашања на прес-конференција, по повод префрлањето на средствата од претфинансирањето во рамките на Инструментот за реформи и раст, како и за Годишниот извештај за имплементацијата на Реформската агенда 2024 – 2027.
Според главниот преговарач со ЕУ, чинот на пристапување е почнат со наша апликација. Условите за пристапување ги поставува официјален Брисел со соодветна динамика и реформи, а во реформската агенда тоа е поврзано со конкретни датуми.
-Ние треба да ги спроведуваме. Не поставуваме услови туку покажуваме грижа со оглед на горчливото минато. Во минатото беа направени грешки. Се обидуваме тоа минато да ни служи како лекција за во иднина, рече Муртезани на прес-конференција во Владата.