Во американската сојузна држава Мичиген денеска се гласа на претседателските прелиминарни избори, каде се очекува тоа да биде само уште една потврда за Доналд Трамп, додека лидерот на демократите Џо Бајден се соочува со незадоволството на муслиманите и Американците со арапско потекло поради војната во Газа.
Актуелниот претседател нема никаква сериозна закана во својот табор во однос на нова трка за Белата куќа бидејќи неговиот единствен противкандидат, демократот Дин Филипс од Минесота заостанува зад него и има помалку од 10 отсто од гласовите на анкетите.
Но, како што расте бројот на загинати во конфликтот меѓу Израел и Хамас, муслиманската и арапско-американската поддршка за Бајден е во опаѓање во оваа држава од Средниот Запад.
Пред четири години Бајден победи во Мичиген со само 150.000 гласови, а сега муслиманско-арапскиот блок ги повикува своите приврзаници да поднесат празно гласачко ливче, со што го притиска Бајден да ја одбие поддршката за Израел и да повика на итен прекин на огнот.
На републиканската страна, Доналд Трамп веќе освои четири држави, вклучително и Јужна Каролина во саботата, а Мичиген не треба да ја прекине својата трка за републиканска номинација.
Неговиот единствен преостанат противник, поранешната амбасадорка на Обединетите нации, Ники Хејли, загуби во нејзината родна држава Јужна Каролина, но таа одбива да се откаже и вели дека не верува дека Доналд Трамп може да го победи Џо Бајден во ноември.