Советот на Општина Аеродром и градоначалникот Тимчо Муцунски имаат одлична соработка, а советничката група на ВМРО-ДПМНЕ има апсолутно мнозинство, така што голем дел од одлуките се носат консензуално, со вклучување на сите партии кои се дел од советот, се истакнува во реакцијата на Општина Аеродром по прес-конференцијата на Стевчо Јакимовски на која тој рече дека неговите советници ќе продолжат да ги поддржуваат градоначалниците на ВМРО-ДПМНЕ.
„Оттаму, обвинувањата што Стевче Јакимовски денеска ги изнесе на прес-конференција за наводно посредување за вработување од страна на градоначалникот Муцунски за советник на ГРОМ се груба лага и невистина. За да се изнесе вакво тенденциозно тврдење пред македонската јавност, Јакимовски треба да располага со конкретен доказ со што би се докажало евентуалното влијание на градоначалникот Муцунски.
Доколку Јакимовски поседува доказ за такво нешто, го повикуваме јавно да го приложи, а доколку го нема, само докажува дека неговата политичка култура е на најниско ниво. Како политичар и народен избраник за неговата позиција, тој треба да се занимава со прашања за кои е избран, а не да се служи со политиканство, измами и лаги.
И покрај тоа што изнесува лаги и манипулации за градоначалникот на Општина Аеродром, Муцунски на Стевчо Јакимовски му посакува добро здравје и работа насочена кон граѓаните на Карпош. Впрочем, тој беше избран од граѓаните на Аеродром и во неговата кампања пред нив чесно вети дека ќе работи во служба на народот и ќе ја промени негативната перцепција за македонската политика, бидејќи граѓаните сакаат подобар живот, резултите и проекти“, се посочува во реакцијата од Општина Аеродром.