Рускиот претседател Владимир Путин им испрати честитки за Божиќ и Нова Година на голем број светски лидери, соопшти Кремљ, но само ограничен број европски лидери беа на листата.
Путин им испрати празнични пораки на лидерите на земјите од БРИКС, вклучувајќи ги претседателите на Бразил, Индија, Кина и Јужна Африка, како и на лидерите на таканаречениот глобален југ и исток. Честитките беа испратени до претседателите на Индонезија, Мјанмар и Монголија, високи функционери на Виетнам, како и на лидерите на Северна Кореја, Венецуела и Куба. Пораки примија и копретседателите на Никарагва и претседателот на Етиопија.
Празнични честитки примија и речиси сите лидери на Заедницата на независни држави (ЗНД), вклучувајќи ги претседателите на Абхазија, Азербејџан, Белорусија, Казахстан, Киргистан, Јужна Осетија и Узбекистан, како и лидерите на Ерменија, Таџикистан и Туркменистан.
Кога станува збор за Европа, Путин им испрати честитки само на тројца актуелни европски лидери – српскиот претседател Александар Вучиќ, унгарскиот премиер Виктор Орбан и словачкиот премиер Роберт Фицо. Од лидерите на земјите-членки на НАТО, празнични пораки беа испратени до американскиот претседател Доналд Трамп и турскиот претседател Реџеп Таип Ердоган.
Покрај актуелните лидери, рускиот претседател испрати честитки и до папата Лав XIV, како и до неколку поранешни лидери, меѓу кои поранешниот германски канцелар Герхард Шредер, поранешниот казахстански претседател Нурсултан Назарбаев и поранешниот кубански претседател Раул Кастро.