Денвер Нагетс го продолжија договорот со Арон Гордон на четири години, пренесува агенцијата АП. Според новиот договор, тој ќе добие 133 милиони долари, информацијата ја потврдија и претставниците на играчот од „Клач Спортс“.
Гордон, шампион со Денвер од 2023 година, е уште еден клучен играч со нов договор со тимот. Бекот Џамал Мареј потпиша четиригодишен договор вреден 208 милиони долари пред еден месец, а трикратниот МВП Никола Јокиќ и Мајкл Портер Џуниор се врзани за Нагетс до 2027 година.
Гордон, кој оваа недела ќе ја започне својата 11-та сезона во НБА лигата, минатата година ја заврши со просек од 13,9 поени и 6,5 скока по натпревар. Тоа се совпадна со неговата статистика во кариерата, во која имаше просек од 13,5 поени и 6,3 скока.
Гордон влезе во НБА во 2014 година кога беше драфтуван како четврти пик. Тој стана дел од Нагетс во март 2021 година.